CENTRAL VISAYAS-Nihimo ang Department of Social Welfare and Development in Central Visayas (DSWD-7) og mga lakang aron madugangan ang turnout sa Pantawid Pamilyang Pilipino Program (4Ps) ug Listahanan-identified nga mga kabus nga pamilya nga nagparehistro alang sa Lifeline Rate Subsidy Program.
Kini ang gikumpirma ni Shalaine Marie Lucero, regional director sa DSWD-7.
Ang Lifeline Rate Act usa ka balaod nga naghatag og subsidya o discounted rates ngadto sa ubos nga kita, marginalized electric consumers, sama sa mga benepisyaryo sa 4Ps ug Listahanan-identified poor households.
Dugang pa, nga ang ahensya nagpahigayon na ug mga orientation, kauban ang Energy Regulatory Commission (ERC), ngadto sa mga local social welfare and development officers aron sila makatabang sa pagpahibalo sa publiko bahin sa programa.
Giangkon ni Lucero nga sa pagkakaron, pipila lang ka benepisyaryo sa 4Ps ug mga kabus nga pamilya sa Listahanan ang nakarehistro sa maong programa.
Kadtong mo-aplay sa programa mahimong makatagamtam sa subsidyo nga hangtod sa 100 porsyento kung ang ilang konsumo sa kuryente ubos sa 20-100 kilowatt-hours, depende sa distribution utilities.
Sa pagkakaron, unom na ka local government units (LGUs) sa rehiyon ang niproseso na sa ilang mga rekisitos alang sa database sharing sa resulta sa Listahanan 3.
Dugang ni Lucero nga gawas sa paggamit sa Listahanan database alang sa Lifeline Rate Subsidy Program, mahimo usab kining gamiton sa mga LGUs alang sa pagplano ug pagpatuman sa social welfare protection programs.
