CENTRAL VISAYAS-Gitinguha sa Bureau of Fire Protection (BFP 7) nga mapa-usbawan ang ilahang alloted budget alang sa tuig 2024.
Gibutyag ni Fire Director Louie Puracan, Chief Director sa Bureau of Fire Director, nga mi-abot na sa P3 billion ang ilahang nakolekta nga mao ang tinubdan sa pondo alang sa modernization program sa BFP.
Atol sa ika-32 nga anibersaryo sa BFP, tinguha sa ahensya nga mapalambo ang ilahang mga pasilidad ug ekipo alang sa mas dali nga pag-responde sa mga emerhensiya.
Matud ni Puracan nga dako usab og natabang ang local government units sa ilahang buhatan, lakip na ang business community nga dako og natampo sa pinansyal nga aspeto.
Giingong kung wala ang maong mga suporta sa naasoy nga stakeholders kay dili mabuhi ang fire department.
Subay niini, dako ang kontribusyon sa mga LGUs ug mga negosyante alang sa pag-pondo sa buhatan.
Gipanglantawan usab sa dakong labaw sa BFP ang hingpit nga katukoran sa dugang fire stations sa rehiyon.
Target nila nga maabot sa 138 ka mga fire stations ang functional sa Central Visayas.
Taliwa sa selebrasyon, gipahinumdoman ang mga bombero sa rehiyon 7 sa pagtarung sa ilahang pagpanarbaho ug pag-serbisyo sa katawhan.
Kini ang nahimong sentro sa panagtapok ug kasaulogan sa 32nd anniversary sa BFP ubos sa tema nga “Modernong Bombero: Kaakibat Tungo sa Ligtas at Maunlad na Pamayanan”.
Gitambongan sa mga bombero lukop Central Visayas ang maong kalihokan kung diin gipasidunggan usab ang mga oustanding fire stations ug personnel.
