LAPU-LAPU CITY-Magsaulog si Bise-Presidente Sara Duterte sa National Heroes Day sa dakbayan sa Lapu-Lapu karong Lunes, Agosto 28, 2023.
Subay niini, gi-finalize na karon sa kapolisan sa dakbayan sa Lapu-Lapu ang ilang pagpangandam sa seguridad aron masiguro ang bise presidente.
Nasayran nga si Duterte moduyog sa pagsaulog sa dakbayan sa National Heroes Day sa Liberty Shrine sa Barangay Mactan.
Matud pa ni Police Colonel Elmer Lim, city director sa Lapu-lapu City Police Office, nga nipahigayon na sila og coordination meeting uban sa kagamhanan sa dakbayan ug sa security group sa bise presidente.
Dugang pa, nga Karung adlawa Domingo, mopahigayon usab sila og send-off ceremony alang sa mga personnel nga mosiguro sa maong aktibidad.
Nasayran, nga ang flag-raising ceremony karong Lunes magsugod sa alas 7:00 sa buntag.
Gawas kang Duterte, mosalmot usab sa maong aktibidad si Department of Tourism (DOT) Secretary Christina Frasco ug Office of the Presidential Assistant for the Visayas (OPAV) Undersecretary Terence Calatrava, uban nila ni Mayor Junard Ahong Chan ug si lone district representative sa dakbayan nga si Congresswoman Cindi Hari-Chan.
