MANDAUE CITY-Gikatakdang mang-apod-apod og cash assistance ngadto sa 12,582 ka recipient-beneficiaries sa Mandaue City ang National Housing Authority (NHA) karung umaabot nga Lunes, Oktubre 16, 2023.
Mao kini ang gibutyag ni NHA-7 regional director Rizalino Cabahug sa usa ka suwat niini nga gitumong ngadto kang Mandaue City Lone District Representative Emmarie Ouano-Dizon.
Matud pa ni Cabahug nga adunay budget allocation ang NHA alang sa mga biktima sa bagyong Odette kansang mga estraktura sa balay hingpit nga naguba.
Dugang sa opisyal nga lakip sa maong budget allocation mao ang Dakbayan sa Mandaue kansang pundo gikan sa National Disaster Risk Reduction Management Fund (NDRRMF) nga gituyo alang sa 12,582 ka recipient-beneficiaries.
Gitakda sa NHA ang pag-apod-apod sa cash assistance alang sa unang tranche nga naglangkob sa 4,000 ka mga benepisyaryo sa Oktubre 16-19, 2023 sa Mandaue Coliseum, Mandaue City sugod sa alas 8 sa buntag hangtod sa alas 5 sa hapon.
Subay sa maong balita, gibutyag usab ni Mandaue City Mayor Jonas Cortes ang mga lugar kung diin ipahigayon ang maong cash distribution.
Matod niini nga sa Oktubre 16, ang mga makadawat gikan sa barangay sa Subangdaku, Cambaro ug Bakilid ug sa Oktubre 17, ang mga makadawat mao ang mga residente sa barangay Paknaan, Umapad ug Banilad.
Samtang sa umaabot Oktubre 18, ang mga makadawat mao ang mga residente gikan sa barangay Labogon, Opao ug Looc ug ingon man ang mga residente sa Barangay Tipolo sa umaabot nga Oktubre 19.
Gipasabot usab niini nga ang naasoy nga cash distribution sundan sa laing cash assistinace distribution pagkahuman sa Barangay ug Sangguniang Kabataan Elections tungod sa pag-obserbar sa Comelec provision o election ban.
