CEBU CITY-Gikatakdang magsugod na sunod semana ang pag-deploy sa mga kapulisan ngadto sa mga dagkong simbahan arun masiguro ang kahapsay ug kalinaw sa umaabot nga tinuig nga Misa de Gallo.
Matud pa ni Police Lieutenant Colonel Janette Rafter ang deputy city director for operation sa Cebu City Police Office nga nangandam na sila alang sa pag-deploy sa mga personnel sa matag simbahan kini pag-siguro sa kaluwasan sa mga manimbahay.
Subay niini, ang CCPO mibutang og mga police assistance desk arun sa pagpahugot sa seguridad nunot sa nahitabong pagpamomba sa Mindanao State University atol sa Catholic Mass niadtong milabayng domingo.
Nasayran usab nga gimandoan ni Police Brigadier General Anthony Aberin si Police Colonel Ireneo Dalogdog atol sa gipahigayon nga command conference nga dili lang mga simbahang katoliko ang bisitahon ug susihon gumikan lakip na ang ubang relihiyon nga mohimo usab sa ilang pagsimba.
