CEBU CITY-Naugdaw ang siyam ka classrooms ug kapin sa duha ka gatos ka mga estudyante ang naapektuhan human nga miulbo ang sunog gahapon, Enero 25 sa Napo Elementary School sa Barangay Sapangdaku sa dakbayan sa Sugbo.
Gibanabana nga moabot og P2.3 milyones ang kinatibuk-ang danyos sa maong sunog diin apektado ang mga tinun-an gikan sa kindergarten hangtod sa ikatulong ang-ang.
Sa gibutyag ni Babylin Palban nga ‘faulty wiring’ ang hinungdan sa sunog ug nagsugod kini sa usa sa mga karaan nga edipisyo ug ingon man nga gituohan nga daling mikatap ang kalayo tungod sa karaan na kini.
Nasayran usab nga sa wala pa mahitabo ang insidente, mihimo og inspeksyon ang Disaster Risk Reduction gumikan walay klase ang mga bata ug aduna’y service training ang mga magtutudlo maong ilang gisiguro nga ‘unplugged’ ang tanang electrical outlets.
Subay niini, gitambagan sa DepEd ang Napo Elementary School nga ‘modular mode’ una ang mga bata ug uban pang apektado sa sunog hangtud maabot ang mga temporary learning center.
