Nipasaka usab og kasong cyber libel batok kang Cristy Fermin ang aktor nga si Dominic Roque sa Office of the City Prosecutor sa Pasay City kagahapong adlawa, Biyernes, Mayo 31.
Giingong ang mga malisyosong pamahayag ug komento ni Fermin sa iyang YouTube channel nga “Showbiz Now” maoy basehan sa kaso nga gipasaka sa aktor.
Sa habig ni Fermin, niingon siya nga katungod sa aktor ang pagpasaka og kaso. Matod niya nga maghuwat na lang siya sa subpoena.
Matud usab niini nga wala pa magsugod ang kaso nga gipasaka kaniadto sa kanhi uyab ni Dom nga si Bea Alonzo ug wala pa makadawat og subpoena si Fermin.
Kahinumdoman, niadtong sayong bahin sa Mayo, ang aktres mipasaka sa samang kaso batok kang Fermin, uban nila ni Ogie Diaz ug mga kauban nilang host sa ilang mga online nga programa.
Ang complaint affidavit ni Bea nagkanayon nga biktima siya sa bakak, malisyoso ug makadaot nga impormasyon gikan sa usa ka indibidwal nga nagpakaaron-ingnong suod kaniya nga gipublikar ug gihisgutan sa online shows nila Fermin ug Diaz nga walay basehanan.
