CEBU CITY-Ipahigayon karong adlawa, Sabado Hunyo 1, 2024, ang opening ceremony sa Cebu Pride Festival alang sa Pride Month nga gisaulog sa bulan sa Hunyo sa tibuok kalibotan.
Kini ang gipahibalo ni Enrique San Juan, Convenor sa Cebu Pride Movement, nga nangandam na sila og lain-laing aktibidad, sama sa libreng HIV testing, mental health counseling ug uban pa, nga ipahigayon sa tibuok buwan sa Hunyo.
Matod niya, kalamboan, panaghiusa ug respeto sa usag-usa, maoy gipasiugda sa ilang grupo alang sa Pride Month karong tuiga.
Gidugang niini nga ang komunidad sa LGBTQIA+ magpadayon sa pagpaningkamot alang sa patas nga pagtratar ug pagrespeto sa mga katungod sa matag tawo.
Dinhi sa Sugbo, adunay mga ordinansa alang sa LGBTQIA+ nga mga tawo, apan wala pa kini hingpit nga napatuman, sama sa pagbutang og gender neutral bathroom sa mga establisemento.
Nasayran nga niadtong 2019 napasar sa Cebu City Council ang nasangpit nga ordinansa, samtang sa samang tuig gibuksan ang gender neutral bathrooms sa Cebu City Police Office, apan wala pa kini gisunod sa ubang mga establisemento.
Apan gipadayag ni San Juan nga ang maong lakang nagpakita sa pag-uswag ug kahibalo sa LGBTQIA+ nga komunidad, butang nga iyang gikalipay.
