Patay ang usa ka babaye samtang samdan ang usa ka lalaki dihang nahulog sa bung-aw ang ilang gisakyan nga traysikol Huwebes sa gabii, Hunyo 20, 2024, sa Sitio Kambawog, Barangay Kampo 4, dakbayan sa Talisay.
Usa ka batang lalaki nga anaa sa pangidaron nga usa ka tuig ang edad ang nakit-an usab sa lugar, apan ang bata gikataho nga wala maunsa.
Napalgan lamang ang mga biktima niadtong Biyernes sa udto, Hunyo 21, sa mga residente nga miadto sa maong dapit aron paghakot og balas gikan sa suba.
Sa pamahayag ni Joy Tumulak kinsa pangu sa City of Talisay Traffic Operations and Development Authority, nga posibleng nahitabo ang insidente taliwala sa kusog nga ulan Huwebes sa gabii.
Matod niya ang lalaki unang nakit-an sa mga residente sa daplin sa sapa, samtang ang babaye napalgan sa punoan sa kahoy duol sa naguba nga traysikol.
Gikataho usab sa mga residente nga nakadungog ang usa ka bata nga naghilak, nga nagdala kanila sa lugar diin nakit-an ang bata.
Giila ang lalaki nga si Jerome Sabal, taga Barangay Quiot, dakbayan sa Sugbo, samtang ang babaye wala pa mailhi.
Matud ni Tumulak nga nakaangkon og samad sa ulo si Sabal ug daling gidala sa tambalanan uban sa bata, samtang ang patay’ng lawas sa babaye gidala sa punerarya.
Nagpadayon gihapon ang imbestigasyon aron mailhan ang namatay.
