Hingpit na nga mabalaudnon ang Sugbo Negosyo Program sa kagamhanang lalawigan sa probinsya sa Sugbo human kini sa pag-endorso sa unang pagbasa atoll sa regular session sa Sagguniang Panlalawigan sa Kapitolyo niadtong Lunes Hunyo 24,2024.
Matod pa sa pakighinabi sa Bombo Newsteam kang Cebu 6th District Board Member Glenn Soco nga kinsay author sa gisugyot nga ordinansa ug chairman sa Committee on commerce and industry nga ang pundo muabot sa P100-milyones matag tuig para sa micro business assistance ug mentorship program nga anaa na sa ikatulong tuig sa pagpatuman niini.
Si Soco kinsa miyembro sa technical working group sa maong programa nga gilusad pag-una niadtong Nobyembre 2021 atol sa pandemya nga nagtumong sa mga small and micro entreprenuers sa lalawigan aron makapuno sa gikinahanglang capital sa negosyo.
Dugang pa ni Soco nga karong tuiga, ang matag kwalipikado nga benepisyaryo kay kinahanglan nga naa sa negosyo sulod sa labing menos 3 ka tuig og makadawat sa P200,000 gikan sa programa, nga mas taas gikan sa naandan nga P10,000 nga tabang sa milabay nga tuig, sa tinguha nga matabangan ang mga micro entrepreneur kansang ang mga produkto mao ang “usa ka labaw sa uban.”
Ubos sa maong programa, ang mga kwalipikadong micro-entrepreneur beneficiaries gisusi ug gipili sa mga buhatan sa 17 ka Board Members ug sa Office of the Vice Governor.
Ang programa aduna usab grand prize winner karong tuiga sa malampusong Negosyo og nagkantidad kini sa P1-milyones.
Giklaro usab ni Soco nga ang tabang gikan sa programa dili ihatag sa kwarta kon dili pinaagi sa QR-coded cards nga magamit sa mga benepisyaryo sa paglukat og pre-approved nga mga butang sa mga tindahan sa Kapitolyo.
Gitino sa maong Board Member nga walay laing LGU sa nasud nga namuhunan sama sa Kagamhanan sa Probinsiya sa Sugbo sa pagtabang sa ilang mga micro-entrepreneur nga madala ang ilang negosyo ngadto sa sunod nga lebel.
