MANDAUE CITY,CEBU-Naluwas sa National Bureau of Investigation Cebu District Office ang 18 ka mga masahista nga gironda sa 2 ka spa ug 1 ka KTV bar sa Brgy Banilad, dakbayan sa Mandaue niadtong Biyernes Hunyo 21.
Mao kini ang gipaambit ni Arnel Pura, ang agent-in-charge sa NBI-7 sa gipahigayon nga conference gahapong adlawa.
Basi sa ilang imbistigasyon nga ang mga babaye nga gitugyan sa balaod kay giingong mga biktima sa human trafficking, gikan sa usa ka establisemento nga giingong nagtanyag og adult o extra nga serbisyo.
Dugang pa nga nagsugod ang ilang operatiba niadtong Disyembre 2023.
Atol sa nahitabong pagpangronda, ang mga undercover agents sa NBI-CEBDO nakigsabot nga adunay duha ka customer care assistant aron manihapon ug molahos sa usa ka motel.
Human mabayri ang duha ka mga babayeng empleyado, gidala na hinuon sila sa mga enforcer sa duol nga safehouse diin gi-debrief sila sa mga social workers sa Department of Social Welfare and Development (DSWD).
Samtang ang ubang mga agents misulod sa bar ug giluwas ang 18 pa ka mga empleyado.
Nipasaka na og kaso ang buhatan sa NBI og Trafficking in Persons batok sa mga nagpadagan sa maong mga balay-kalingawan.
