CEBU CITY-Mipahimangno ang buhatan sa Department of Veterinary Medicine and Fisheries (DVMF) sa publiko kabahin sa risgo sa mga produktong dinakpan sa dagat nga adunay kalambigitan sa red tide sa dakong bahin sa kabisay-an.
Kini human miluwat ug abiso ang Bureau of Fisheries and Aquatic Resources (BFAR) sa red tide alert sa dagkong bahin sa Visayas ug Mindanao nga usa mga lugar pang-Angkatan sa mga merkado sa dakbayan.
Apan giklaro kini ni DVMF Fishery Division Assistant Head Maria Merlyn Mirallo nga wala pay natala sa ilang opisina sa taho kabahin sa red tide contamination sa 16 ka mga coastal barangays sa dakbayan sa Sugbo.
Gi-isyu sa BFAR ang mao bulletin advisory niadting Agosto 22 nga nagpahimangno sa mga konsumidor nga maglikay sa produktong dinakpan sa dagat ilabi na ang “shellfish” nga nakuha gikan sa kadagatan sa Samar, Eastern Samar, Leyte, Zamboanga Sibugay, Surigao del Norte, and Palawan tungod sa presensya sa red tide.
Hinuon, ang buhatan sa DVMF padayong sa ilang regular nga pagbantay aron mailikay ang publiko sa kadaot nga hatud sa red tide contaminated seafoods.
Ang red tide usa ka panghitabo nga mahitabo sa baybayon kung ang mga lumot motubo nga dili makontrol. Nakuha ang ngalan niini tungod sa pagdaghan sa mga lumot nga maoy hinungdan sa pagkapula sa tubig sa dagat, ingon man sa lunhaw or brown.
