LAPU-LAPU CITY- Gitaktak si Police Colonel Ali Baron isip City Police Director sa Lapu-Lapu City.
Kini subay sa padayong imbestigasyon sa task force sa Department of Interior and Local Government (DILG) kalabot sa girondang illegal nga Philippine Online Gaming Operator o POGO hub sa dakbayan sa Lapulapu.
Gitataw ni Police Lt. Col. Christian Torres ang tigpamaba sa Lapulapu City Police Office (LCPO), nga ang Philippine National Police sa national headquarters ang miduso sa kamanduan nga tangtangon si Col. Baron.
Gitaktak usab ang Hepe sa Regional Intelligence Division sa Police Regional Office-7 (PRO-7) nga si Police Colonel Gervacio Balmaceda ug ang Hepe sa Criminal Investigation and Detection Group (CIDG-7), Police Colonel Marlon Santos.
Dugang ni Torres, nga walay mipuli kang Col. Baron ug ang iyang deputy City Director for Administration nga si Police Lt.Col. Conrado Manatad ang Officer-In-Charge usa sa LCPO.
Gibutyag ni Torres nga ang tulo ka dagkong opisyal ipaubos sa pre-charge investigation aron masuta kon aduna bay kapakyasan o kahuyang sa ilang pagmonitor sa mga ilegal nga kalihokan sa ilang hurisdiksyon sa dili pa sila pasakaan og kasong administratiba.
Mao kini ang gihimo sa LCPO ngadto sa Hepe sa Lapulapu Intelligence Unit nga si Lt.Col. Dindo Alaras ug Hepe sa Station 4, Major Judith Besas nga giimbestigahan usab ug anaa karon sa Personnel Holding and Accounting Unit sa LCPO.
Diin hangtod lang sa tulo ka buwan ang ipahamtang sa kasong administratiba kon mapamatud-an nga sad-an ang duha ka opisyal sa pagpabaya sa ilang trabaho.
Apan, kon makita nga mas seryoso ang ilang pagkalambigit sa kaso isip protektor sa operasyon sa POGO, matud ni Torres nga ilang iduso ang kasong administratiba ngadto sa PRO-7 headquarters.
