Gihatagan og gibug-aton ni world No. 3 pole vaulter EJ Obiena nga dili gayud siya mo-endorso og mga produkto nga may kalabotan sa ilimnong makahubog ug sugal.
Kini nunot usab sa giingong paggamit sa pipila ka kompanya sa iyang pangalan ug imahe aron lang ipakita nga nag-endorso siya sa ilang mga produkto.
Ang maong modus, matod niya, gihimo sa mga kompaniya nga walay pagtugot kaniya.
Gipasalig ni Obiena nga dili siya mo-endorso sa mga produkto nga makadaot sa katawhan ug sa himsog ug malamboong komunidad.
Ang argumento ni Obiena, bisan pa man sa legalidad sa pipila ka gambling sites ug sa pagbaligya sa mga produkto sa alkoholikong ilimnon, gipili kuno niya nga dili i-endorso tungod kay gidili kini sa mga batan-on.
Tungod kay aduna siyay plataporma nga makaimpluwensya sa mga batan-on, giingong gidawat niya ang responsibilidad uban ang dignidad ug pagpaubos.
Gipasalig ni Obiena, ang iyang mga abogado naghimo usab og tukmang lakang batok sa mga modus operandi.
