Nanawagan si Senador Juan Miguel Zubiri sa mga mahinungdanong ahensya sa gobyerno nga dugangan ang kahibalo sa publiko kabahin sa peligro ug ligal nga sangputanan sa fraternity hazing.
Lakip niini mao ang Commission on Higher Education (CHED), Department of Education (DepEd), ug Department of the Interior and Local Government (DILG).
Kini nga panawagan nunot sa hukom sa mga suspek sa kamatayon sa biktima sa hazing nga si Horacio ‘Atio’ Castillo III ug nunot usab sa kaso sa kamatayon sa 18-anyos nga estudyante sa Nueva Ecija tungod usab sa hazing.
Gipasabot ni Zubiri nga ang mga mipatay kang Atio kay nakonbikto ubos sa 1995 Anti-Hazing Law ug dili ubos sa 2018 version sa balaod hinungdan nga wala’y school official nga nakonbikto sa kamatayon sa biktima.
Bisan og nalipay ang senadora nga ang 10 ka mga sakop sa fraternity nga mipatay kang Atio gisilotan og “reclusion perpetua”, ang magbabalaod niingon nga angay usab nga manubag ang mga opisyal sa tunghaan sa kaso.
Ang magbabalaod namahayag nga bisan pa sa Anti-Hazing Act of 2018, pipila ka mga sektor sa academic community ang nagduha-duha pa sa pagwagtang sa kultura sa hazing tungod kay daghan sa mga faculty member mga alumni sa fraternities o organisasyon.
Tuyo ni Zubiri nga makig-estorya kang Education Secretary Sonny Angara ug Commission on Higher Education (CHED) Chair Prospero de Vera nga magpagawas og memo warning ang mga tunghaan ug unibersidad sa mga organisasyon, fraternities, ug ubang grupo diin magpahibalo nga ang hazing usa ka krimen ug silotan kini ubos sa balaod.
Gihangyo usab ni Zubiri ang mga lider sa fraternity nga kondenahon ang mga bayolenteng hazing practices.
