NEGROS ORIENTAL- Mabutang sa Comelec Watchlist ang tibuok probinsya sa Negros Oriental tungod sa intense political rivalry.
Sa pamahayag ni Comelec Negros Island Region (NIR) Regional Election Director Atty. Lionel Marco Castillano nga niadtong miaging 2023 Barangay ug Sangguniang Kabataan Elections (BSKE), ang Negros Oriental ubos sa Comelec control tungod sa kaagi sa init nga panagribal sa politika sa maong dapit.
Matod ni Castillano, nga ang katuyoan sa pagbutang sa Negros Oriental sa Comelec Watchlist mao ang tukmang pagpahimutang sa security plan ug pagtutok sa mga lugar nga mahimong tinubdan sa kapintasan sa eleksyon sa mga kandidato.
Sa pinakaulahing datus sa Comelec, sila si kanhi Gobernador Pryde Henry Teves ug Stephen Tuballa, kinsa usa ka retired navy, nisang-at sa ilang kandidatura sa pagka-gobernador.
Samtang si incumbent Governor Manuel Sagarbarria ug Janice Degamo, asawa ni anhing Gobernador Roel Degamo, gilauman usab nga mo-file sa ilang COC.
