Gikompirmar ni kanhi Presidente Rodrigo Roa Duterte nga iyang gitahasan si kanhi Philippine Charity Sweepstakes Office General Manager Royina Garma sa pagpangita og mga polis nga gamiton sa kampanya batok sa ilegal nga drugas.
Kabahin sa pagbutyag ni Garma sa miaging Quad Comm hearing, niingon nga gipatawag siya ni Duterte niadtong Mayo 2016 ug gihangyo nga pangitaon ang mga polis nga sakop sa INC nga adunay katakos sa pagpatuman sa drug war base sa ‘Davao model’ nga daw gihimo usab ni Garma.
Matud ni Duterte nga iya gayud nga gimanduan si Garma nga mangita og mga polis nga sakop sa maong sekta.
Gumikan ang maong mga polis mahimong saligan sa bisan unsa nga ‘patrabaho’ ug sa kuwarta o pundo nga ihatag kanila.
Hinuon wala na gidetalye sa kanhi presidente kon unsa nga proyekto ang iyang gipasabot nga mahimong ma-assign sa maong mga polis.
Sa laing bahin, giklaro sa kanhi presidente nga wala siya magmando sa kapulisan nga patyon ang mga drug personalities bugti sa katugbang nga kantidad.
Matod sa kanhi Presidente, adunay gigahin nga pundo alang sa kampanya batok sa drugas, apan alang lamang sa operational expenses ug dili isip reward o reward sa mga polis nga makapatay sa mga drug personality.
Gitataw ni Duterte, way polis nga gustong mobuhat niini kay seguradong mapriso sila.
Kon mohatag siya og kuwarta, matod niya nga operational fund lang kini ug dili isip reward.
Gikonpirmar usab sa kanhi presidente ang iyang kamandoan ngadto sa kapolisan nga kon mosukol ang mga drug personality sa mga operasyon aduna silay katungod nga manalipod sa ilang kaugalingon.
