CEBU CITY- Magpadayon ang sugyot nga Waste-to-Energy (WTE) Project sa kagamhanang dakbayan sa Sugbo bisan paman sa nasinati niining kalangan tungod sa nagkadaiyang balda sa proseso niini.
Kini ang giklaro ni Cebu City Councilor Joel Garganera, ang Chairman sa Committee on Environment and Natural Resources, diin gitataw niini nga ang kontraktor sa WTE project nga New Sky Energy Philippines, Inc. gihatagan sa mas taas nga lugway sa panahon aron ma-comply ang mga resikitos human kini nabalda ang proseso.
Dugang sa konsehal nga mipasalig siya nga ang proponent sa proyekto magpabilin committed aron masugdan ang proyekto.
Sa usa ka sulat ngadto sa kagamhanang dakbayan niadto buwan sa Septiyembre ning tuiga, ang New Sky Energy mihangyo og usa ka tuig nga lugway sa pagtukod sa pasilidad tungod sa panginahanglan sa dugang panahon sa pagkuha sa gikinahanglang mga permit ug uban pang mga kontrata.
Ang sulat miabut usa ka tuig human ang dakbayan mipirma sa usa ka joint-venture agreement nga kasabutan uban sa New Sky Energy aron ipatuman ang proyekto.
Matod ni Garganera nga usa ka problema nga nasugatan sa proponent mao ang pagkuha sa gikinahanglang mga dokumento gikan sa Department of Environment and Natural Resources (DENR) ug sa Department of Energy (DOE).
Dugang pa, nga napakyas ang New Sky Energy sa pagkuha sa gikinahanglang mga dokumento gikan sa DENR human ang pipila sa mga opisyal niini gisuspenso sa Office of the Ombudsman-Visayas sayo ning tuiga.
Ang proyekto mahimo usab nga usa ka solusyon sa mga problema sa basura sa dakbayan, ilabi na sa nahitabo sa pribadong landfill sa Barangay Binaliw sa bukirang bahin sa dakbayan sa Sugbo.
