CENTRAL VISAYAS- Gihingusgan sa Philippine Coast Guard (PCG) District 7, uban sa kapulisan sa Dumanjug ug ubang mga ahensya, ang pag-monitor sa pagsulod sa mga buhing baboy sa tibuok kabaybayonan sa Southern Cebu subay sa kamanduan ni Gobernador Gwendolyn Garcia.
Samtang, wala nay dugang insidente nga naglambigit sa mga undocumented nga baboy nga na-report sa Dumanjug sugod niadtong Biyernes, Nob. 1, 2024, sukad sa 79 ka baboy gikan sa Isla sa Negros ang nasakmit niadtong Sabado, Oktubre 26.
Si PCG 7 Commander Weniel Azcuna, nagkanayon nga bag-ohay lang nilang gihisgutan ang ilegal nga pagdala sa mga baboy gikan sa Negros Oriental uban ni Gobernador Garcia, ang Philippine National Police PNP) ug Philippine Navy.
Siya niingon nga ang gikabalak-an sa gobernador mao ang kaluwasan ug kalidad sa mga baboy nga walay gikinahanglang permit o clearance gikan sa mga buhatan sa gobyerno.
Sa pikas bahin, si Dumanjug Mayor Efren Guntrano “Gungun” Gica kay gipa-asal (gi-lechon) ang mga nasikop nga mga smuggled nga baboy subay sa Executive Order gikan sa kagamhanang probinsya sa pag-konpiska ug pag-disposed sa maong dinakpan nga gipang-apod-apod rapud sa mga sam-ang sa lungsod sa Dumanjug.
