Gibasol ni Senador Imee Marcos ang giingong kakuwang sa hinanaling pahimangno sa PAGASA nga nakaingon sa kamatayon sa daghang mga indibidwal tungod sa bagyong Kristine.
Si Marcos niingon nga walay igong pasidaan gikan sa state weather bureau kalabot sa posibleng epekto ni Kristine, diin 146 ka mga tawo ang namatay ug 91 ang naangol, samtang 19 ang gikataho nga missing.
Gitataw sa senador, kon tukma nga gipahibalo sa PAGASA ang local government unit bahin sa epekto sa uwan, daghan unta nga mga indibidwal ang namakwit og sayo ug dili unta mamatay.
Nangutana si Marcos ngano nga sa matag bagyo daw kulang ang abiso nga adunay igong pundo ang gobyerno.
Matod niya kon itandi ang 2024 General Appropriations Act sa 2025 National Expenditure Program, ang budget sa Department of Science and Technology misaka og P1.542 bilyon.
Ang PAGASA misaka usab og P290 milyones, gikan sa P1.641 bilyones ngadto sa P1.931 bilyones alang sa 2025.
