Malampusong nalangkat sa 17-anyos nga Filipino speed skater nga si Peter Groseclose ang bronze medal sa International Skating Union Junior World Cup 2 nga gipahigayon sa Bormio, Italy.
Malipayong gipaambit ni Nikki Cheng, ang presidente sa Philippine Skating Union, diin kini nga kadaugan maoy labing unang medalya sa Pilipinas sa maong kompetisyon.
Si Groseclose mitapos sa ikatulo sa 500 meters nga lumba human si Koo Miseung sa Korea nga nakadaog sa bulawang medalya samtang si Victor Chartrand sa Canada maoy ikaduha nga nakadaog sa silver medal.
Kahinumduman nga niadtong Enero ning tuiga, napakyas ang Pinoy speed skater nga makakuha og medalya tungod sa wala damhang pagkabangga sa usa ka Chinese nga kakompetensya nga maoy hinungdan nga naapektuhan ang iyang kadaugan.
Hinuon, nakarekober na ang Pinoy speed skater ug nagpadayon sa iyang pagpangandam alang sa Olympic qualifying events nga iyang salmotan sunod tuig.
