CEBU CITY-Nipasaka og daghang reklamo si kanhi Cebu City administrator Collin Rosell sa Office of the Ombudsman-Visayas diin may kalabotan sa iyang “unlawful arrest” atol sa insidente niadtong Nobyembre 8, 2024.
Gihinganlan ni Rosell ang mosunod nga mga respondents: nga sila si Cebu City Mayor Raymond Alvin Garcia, Cebu City Acting City Administrator Kristine Joyce Batucan, Cebu City Police Office Chief Colonel Antonietto Cañete, Police Station 3 Chief Major John Lynbert Castigador Yango, mga sakop sa Police Station 3, ingon man si Cebu City Legal Office Head Santiago Ortiz Jr.
Ang mga reklamo naglakip sa mga kaso nga Arbitrary Detention, Unlawful Arrest, Tumultuous Disturbance, Physical Injuries, Grave Threats, Grave Coercion, Malicious Mischief, Violation of Republic Act 11983 (the New Philippine Passport Act), Violation of Republic Act 8484 as amended by Republic Act 11449 (ang Access Device Regulation Act of 1998), Paglapas sa Section 10 sa Republic Act 7610 (ang Anti-Child Abuse Act), Grave Misconduct, Gross Neglect of Duty, ug Grave Abuse of Authority.
Nangayo og danyos si Rosell ug ang pag-isyu og preventive suspension order batok sa mga nalambigit nga opisyal.
Gipaambit usab ni Rosell ang iyang kahiubos kabahin sa mga butang nga giingon niini nga gikuha ug gitagoan sa mga sakop sa kapulisan.
Matud niini nga bisan paman nga gawasnon na kini human makapyansa kay wala gihapon gihatag sa iyaha ang mga butang nga magamit niini sa iyang trabaho ug mga personal nga mga gamit.
Mipasabot usab kini sa gipasaka nga Anti-Child Abuse Act diin matud pa nga sa pagkuha sa mga kabtangan niini kay nakaapekto sa pamilya kang Rosell ug misangpot sa kagutom nila.
