Gitaho sa Department of Health (DOH) ang pagsaka sa ihap sa mga bakwit sa Kanlaon nga nakasinati og respiratory infections sukad nga gimando sa gobyerno ang mass evacuation.
Matud sa DOH – Negros Island Region, nga miabot na sa 74 ka evacuees ang nataptan sa nagkalain-lain nga respiratory infections sukad gipahamtang ang forced evacuation.
Adunay kinatibuk-an nga 71 ka mga tawo ang adunay uban pang mga sakit.
Agi’g tubag sa DOH kay adunay kinatibuk-ang 77 ka mga medical personnel ang gipakatap sa 32 ka evacuation centers sa mga apektadong lugar.
Nadiskobrehan sa mga medical personnel ang taas nga ihap sa mga masakiton atol sa regular check-up ug halapad nga pagpaniid sa panglawas.
Gibantayan nila ang mga evacuation center sa La Castellana, Bago City, La Carlota City, ug San Carlos City sa Negros Occidental ug Canlaon sa Negros Oriental.
Gipaneguro sa DOH ang padayon nga pag-release sa mga tambal ug uban pang medical supplies ngadto sa mga evacuation centers aron magamit sa mga masakiton nga bakwit.
Matod sa DOH, naka-apod-apod kini og kinatibuk-ang 135,329 ka nagkadaiyang tambal, 87,200 ka N15 mask ug 48,500 ka face mask, 17,000 ka aquatabs, 349 ka nebulizer kits ug liboan ka surgical gloves ug goggles, sukad mibuto na usab ang bulkan niadtong sayong bahin sa Disyembre.
