CEBU CITY- Magpabiling abli sa publiko ang kadalanan sa Natalio Bacalso Avenue ning dakbayan sa Sugbo atol sa Sinulog Grand Parade inig Enero 19, 2025.
Kini ang saad sa buhatan sa Cebu City Traffic Office (CCTO) sa panagtigom niini sa kadagkuan sa kagamhanang lalawigan sa Sugbo ngadto sa Kapitolyo.
Diin nakigtagbo ang representante sa CCTO nga si Pastor “Jongjong” Alcover II didto kay Cebu Provincial Governor Gwendolyn Garcia.
Kini nunot sa kahimtang sa maong dalan nga maoy primerong agian sa Cebu South Bus Terminal (CSBT) nga gidumalang terminal sa Kapitolyo.
Sa maong pakigpulong, gitataw ni Governor Garcia nga importante sa kadaghanang komyuters ang pag-abli sa maong dalan inig adlaw sa Sinulog.
Si Alcover misaad sa gobernadora nga ilang sigurohon nga abli ra ang N. Bacalso aron makasulod ra ang mga tawo ug ang mga bus nga mosulod ug gawas sa CSBT aron mapabilin ang regular nga operasyon niini.
Ang N. Bacalso duol ra sa Cebu City Sports Center (CCSC) kon asa ipahigayon ang ritual showdown sa mga contingents nga musalmot sa Sinulog sa Grand Parade.
