Patay ang 2 ka sundalo samtang 7 ang samdan sa engkwentro tali sa mga sundalo ug armadong grupo nga sakop sa Moro Islamic Liberation Front (MILF) ning Miyerkules sa hapon sa Upper Cabengbeng, Sumisio, Basilan.
Ingon man nga gisunog usab ang usa ka military truck nga gikargahan og mga sundalo sa mga armadong grupo.
Kini nga taho gikompirmar ni 101st Brigade commander Brigadier General Alvin Luzon, kinsa miingon nga kini nga insidente tungod sa miscoordination.
Ang insidente nahitabo mga alas 4 sa hapon, Enero 22, 2025 wala madugay human sa pag-abot sa mga representante sa UNDP sa lugar.
Matod ni BGen. Luzon, gipadala sa lugar ang mga sundalo sa Philippine Army 32nd Infantry Battalion isip siguridad sa mga representante sa UNDP nga giingong mohimo og development project sa maong dapit sa dihang kalit silang gi-ambush sa giingong MILF peace spoilers.
Nagpadayon usab ang clearing operation sa lugar ug nakig-alayon na ang militar sa pamunuan sa MILF sa Basilan kalabot sa maong insidente.
