CEBU CITY- Mokabat sa 25 ka kilo sa gituohang illegal nga drugas ang nasakmit gikan sa inahan ug anak sa Pier 4 sa dakbayan sa Sugbo mga alas 7 sa buntag Huwebes, Enero 23, 2025.
Ang mga nasakmit nga drugas adunay gibanabanang standard market value nga P170 milyones.
Giila ang mga suspetsado nga mga residente sa Barangay Ermita ning dakbayan sa Sugbo.
Niangkon ang Inahan nga gitahasan lang sila sa paghatod sa sakyanan paingon sa dakbayan sa Sugbo gikan sa Masbate ug wala sila makabantay nga aduna kini ilegal nga drugas.
Matod pa niya nga wala siya makaila sa tawo nga nagsugo kanila sa paghatod sa sakyanan.
Sa pakighinabi sa Media kang Alex Tablate, Regional Director sa Philippine Drug Enforcement Agency-Central Visayas (PDEA 7), gitino niini nga pag-abot sa pantalan sa naasoy nga mga suspek, gilikayan nila ang inspeksyon nga gihimo sa mga sakop sa Philippine Coast Guard nga naggamit og K9 Unit.
Hinungdan, nga na-aghat ang mga awtoridad sa pagpahunong ug pagdetine kanila.
Nagpasalamat si Tablate sa tanang Joint Unit nga nitabang sa ilaha sa pag-intercept sa usa ka dako nga drugas nga ilahang nasakmit, sama sa Coast Guard District Central Visayas, Naval Forces Central, Bureau of Customs ug mga Kapulisan.
Gidugang niini, nga random lamang kini nga pag check sa mga bagahi ug sakyanan nga ninaog sa Pantalan, hinungdan nga hilabihan ang ilahang kakurat nga ing-ani kadaghang drugas ang dala sa mag-inahan.
Gihatagan niini ug gibug-aton nga mao kini ang resulta kung magtinabangay ang tanang ahensya sa Gobyerno.
