BOHOL-Mipahimangno ang Philippine National Police-Bohol batok sa mga Fake News ngadto sa publiko nunot sa nag-viral nga fake post mahitungod sa usa ka politiko sa probinsya sa Bohol.
Kini human nag viral ang usa ka post sa usa ka dummy account nga migamit sa pangalan ni Congresswoman Van-van Aumentado ug pagpirma sa kongresista sa impeachment case batok kang VP Sara Duterte nga gi share sa usa ka Facebook page nga “Bohol Viral”.
Matud pa ni PLTCOL Norman Nuez, ang tigpamaba sa Bohol Provincial Police Office, nga ang maong reklamo gidawat ug giimbestigahan na sa kapulisan sa probinsya sa Bohol ug ilang nasuta nga ang mao nga post edited lamang kini ug dili tinuod.
Pahimangno ni Nuez sa publiko nga magbinantayon sa mga post nga makita sa social media ug ireport kini ngadto sa kapulisan aron dili mokaylap ang mga sayop o pekeng impormasyon nga posibleng makadaot sa publiko.
Sa pagkakaron padayon gisuta sa kapulisan sa Bohol ang nihimo niining mga post ug posibleng kasong kalapasan sa anti Cybercrime law ang ipasaka batok sa nag-impersonate ug nag-post og fake news. | Bombo Rexmond Omega
