MANDAUE CITY- Nabalhog sa prisohan sulod sa pipila ka oras sa dakbayan sa Mandaue ang sikat nga artistang si Baron Geisler human kini nang-hagis tungod sa grabeng kahubog niadtong Sabado sa kadlawOn, Pebrero 22, 2025.
Kini ang gikumpirma ni Police Lt Col Mercy Villaro,Spokesperson sa Mandaue City Police Office (MCPO) atol na sa sa eksklusibong pakighinabi sa Bombo Newsteam.
Kung diin gilatid niini, nga napriso si Geisler tungod sa kalapasan sa Mandaue City Ordinance No. 11-2008-434 (Drunkenness) o grabeng kahubog diin mismong iyang mga bayaw (brothers-in-law) ang mipapriso niini kay nanghagis na sa ilang dapit.
Apan ang maong kalapasan sa balaod ni Geisler kay usa lamang ka ‘misdemeanor’ nga aduna ray multa nga P500.
Dugang pa, nga human sa pipila ka oras nakagawas ug nakapauli ra dayon ang actor sa ilahang panimalay sa dakbayan sa Mandaue, kini human nga gibayranan sa iyang asawa ang naasoy nga penalty.
