Mag-atubang gihapon sa deportation crackdown ang mga undocumented Filipino immigrants sa Estados Unidos sa administrasyong Trump batok sa mga ilegal nga imigrante.
Matod ni Philippine Ambassador to the United States Jose Manuel Romualdez, ubay-ubay na nga mga bag-ong niabot nga mga Filipino ang nakadawat og abiso nga sila i-deport balik sa Pilipinas.
Bisan kung dili pa sigurado ang gidaghanon sa mga apektadong indibidwal, kadaghanan kanila gikataho nga anaa sa mga estado nga adunay daghang komunidad nga Pilipino, sama sa California, New York, ug New Jersey.
Hinungdan nga giawhag ni Romualdez ang mga apektadong Pilipino nga kasamtangang nagpuyo sa U.S. sa pagpangita og legal nga paagi aron sila magpabilin sa nasud.
Kahinumdoman nga kining crackdown subay sa mga taho niadtong Enero nga 24 ka undocumented Filipinos nga nalambigit sa “petty crimes” ang gipa-deport ubos sa administrasyon ni Biden.
Gihisgutan usab ni Romualdez ang posibilidad nga magpabilin ang mga Filipino sa U.S. kung limpyo ang ilang immigration history.
Gidugang sa Embassy nga ang mga Filipino nga nagpuyo sa U.S. sulod sa kapin lima ka tuig, ang pagtrabaho, ug pagbayad og buhis adunay mas taas nga kahigayonan nga mahimong legal ang ilang pagpabilin, ilabina kon sila mosulod sa nasod nga adunay balido nga work visa, bisan kon kini expired na.
Hinuon, gipasiugda sa embahada nga lahi ang kahimtang sa mga nangabot gamit ang tourist visa.
Ning bag-o lang, gilusad sa U.S. Department of Homeland Security ang usa ka ad campaign nga nag-awhag sa mga ilegal nga imigrante nga boluntaryong mobiya ug likayan ang posibleng deportasyon.
Bisan pa sa nagpadayon nga pagsumpo sa imigrasyon, gipasalig ni Romualdez nga magpabiling lig-on ang relasyon tali sa Pilipinas ug Estados Unidos ubos sa ikaduhang termino ni US President Donald Trump.
Iyang gipasalig nga walay dagkong kausaban sa ilang relasyon.
Sa laing bahin, ang Department of Foreign Affairs (DFA) ug Department of Migrant Workers (DMW) nigahin og pundo alang sa legal, financial, ug medical nga tabang alang sa mga apektadong Pilipino, samtang ang Department of Labor and Employment (DOLE) nagtanyag og suporta sa mga Filipino nga iuli sa Pilipinas.
