Gimandoan na ni Atty. Arvin Odron, ang Regional Director sa Commission of Human Rights sa Central Visayas ang Central Office sa pagpadala og tawo sa Panglao, Bohol aron sa pagpahigayon og imbistigasyon sa nahitabong insidente nga nalambigit sa mga sakop sa Land Transportation Office 7 ug sa usa ka mag-uuma nga giingong gi-harass sa mga opisyal.
Atol sa pakighinabi sa Bombo Radyo Cebu ngadto kang Atty. Odron, nga sa Lunes, Marso 3 kay mobiyahe paingon ang iyang sakop sa Bohol aron sa pagsuta sa insidente.
Gipaambit usab niini ang iyang inisyal nga tan-aw sa video nga mikatap nga walay senyales nga adunay ‘aggression’.
Diin nagpasabot nga kung ang suspek kay wala migamit og pwersa kay dili usab ‘required’ ang bisan kinsang government officials sa pag-gamit og pwersa.
Dugang pa niini nga, ‘too much’ ang makita sa video tungod kay sa tan-aw sa opisyal nga adunay ‘advantage’ sa habig sa mga sakop sa LTO-7 tungod kay daghan kini batok sa usa ka mag-uuma.
Ingon man ang giingong misuway kini og dunggab kay sobra ra usab.
Kahinumduman nga mikatap ang usa ka video online nga nagpakita sa mga opisyal sa LTO 7 sa Panglao, Bohol nga giingong nanghasi sa usa ka lalaki nga nagmotorsiklo.
Makita sa video, ang mga naka-uniporme nga opisyal miduol sa lalaki ug misuway sa pagdakop kaniya tungod sa pagdala og kutsilyo sa pampublikong lugar.
Sa dihang nakuha na ang kutsilyo, padayon nilang giguyod ang lalaki panaog sa motor ug gisuwayan pagdakop. Misukol ang lalaki ug balik-balik nga niingon nga usa siya ka mag-uuma.
Ug ang maong panghitabo kay nakaani og daghang pagsaway tungod sa walay puangod nga gihimo sa mga opisyales.
