Nakadawat og usa ka pasidungog ang buhatan sa Cebu City Department of Veterinary Medicine and Fisheries (DVMF) nga gikan sa usa ka Animal Welfare Organization.
Kini ang gianunsyo ni Dr. Alice Utlang, ang pangu sa DVMF sa official post niini pinaagi sa iyang social media account nga naghulagway nga ang ilang buhatan kay napilian isip recipient sa “Best Animal Welfare Award” gikan sa Biyaya Animal Care organization.
Pinaagi sa usa ka liham ang pahibalo sa maong award diin gitanyag sila isip grand prize winner sa outstanding contributions sa pagpakabana sa mga kahayupan sa dakbayan.
Dakong gikalipay kini ni Dr. Utlang diin iyang gipasalamanat ang ilang tibuok sakop sa kadaugang nadawatan.
Ang Biyaya Animal Care kay usa ka organisasyon nga nagtinguha sa mga kalihukan nga adunay tumong sa paghimo og positibong kaayohan sa mga hayop diri sa Pilipinas.
Sa pikas bahin, sigon ni Rina Ortiz ang co-founder sa Biyaya Animal Care nga niadtong Marso 11 (Martes) nila gitunol ang maong pasidungog ngadto sa buhatan sa DVMF nga mao ilang napilian gumikan sa nakitang maayong pagpatuman sa mga programa niini.
Usa sa mga malampusong programa mao ang “Catch-Neuter-Vaccinate-Return” o ang pagdakop sa makit-ang libod-suroy nga mga iro ug iring, pagkapon ug pagbakuna kanila, ug pagbalik nila sa lugar hain sila napuniti sa mga taga-DVMF nga kusganong gipatuman sa pamunuan ni Dr. Utlang.
Gibutyag ni Dr. Utlang nga sa tibuok nasod kay naila ang dakbayan sa Sugbo lang ang usa sa mga nakakuha sa maong award.
Gipahibawo sab niya nga tungod sa maong award, hatagan sa Biyaya Animal Care ang DVMF ug mga ekipo nga magamit sa ilang buhatan, sama sa dental apparatus, CBC apparatus, operating table nga may suga, surgical instrument, ug anesthetic gas.
