TALISAY CITY-Nailhan na sa kapulisan sa dakbayan sa Talisay ang nanulis sa usa ka taxi niadtong milabay nga adlaw.
Mao kini ang gipaambit ni Police Lt. Col. Maila Maramag, ang kasamtangang hepe sa kapulisan sa Dakbayan sa Talisay.
Matud niini nga dako ang ilang kalipay nga nailhan na ang suspek, ingon man ang ilang pasalamat sa mga mitabang pinaagi sa mga habal-habal driver lakip na usab ang nakuha nga CCTV footage.
Gihulagway ni Maramag ang suspek nga notadong tulisan diin mani-on kini og armas o mga hait nga hinagiban ngadto sa iyang mabiktima.
Sama nalang sa nahitabo sa 46-anyos nga taxi drver nga iyang gitulis ug gikuha ang P1,600 nga kita sa pamasahero.
Diin nagpakaaron-ingnon kini nga pasahero kinsnag misakay gikan sa Barangay Tabunok ug minaog sa Barangay Lawaan 3.
Ingon man nga mikatag sa social media ang kuha sa dash cam nga walay kurat sa paghimo sa krimen ang maong suspek.
Sa pagkakaron, gipanid-an na sa mga sakop sa kapulisan ang lihok sa suspek aron sa paghimo sa pagdakop niini.
