Tam-is nga pahiyom ang nahimong tubag ni Presidente Ferdinand Marcos Jr. sa dihang gipangutana kon nagplano na ba ang Pilipinas nga mahimong miyembro pag-usab sa ICC.
Matod ni Palace Press Officer USec Claire Castro, gipaabot ni Presidente Marcos nga hangtod karon wala pa hisguti ang kalabot sa pagbalik sa Pilipinas sa pagka miyembro sa Rome Statute.
Ingon man nga nagpabilin ang baruganan sa Presidente nga ang ICC walay hurisdiksyon sa Pilipinas.
Kini bisan og si kanhi Presidente Duterte anaa na sa kustodiya sa International Criminal Court.
Una nang gipahibalo sa gobyerno nga ang warrant of arrest nga giluwatan sa ICC batok kang ex-PRRD giduso ngadto sa Interpol, busa walay rason nga dili motubag niini ang Pilipinas.
Sa pikas bahin, giklaro ni Castro nga ang hukom sa ICC sa kaso ni ex-PRRD, kon makonbikto siya, dili igong basehanan aron mawala ang iyang mga benepisyo nga nadawat gikan sa gobyerno.
Giklaro ni Castro nga ma-forfeit lang ang benepisyo sa kanhi presidente kon ang korte dinhi sa Pilipinas mopagawas og hukom.
Ang Palasyo nipahibawo nga ang mga kanhi Presidente sa nasud nakadawat og mga benepisyo gikan sa gobyerno.
