Gi-ambush ang usa ka Election Officer uban ang asawa niini sa Barangay Makir, lungsod sa Datu Odin Sinsuat sa lalawigan sa Maguindanao del Norte kaganihang buntag karong adlaw sa Miyerkules, Marso 26, 2025.
Giila ang mga biktima nga sila Bai Maceda Lidasan Abo ug ang bana niini nga si Jojo Abo kinsa gipamusil human gi-ambush sa wala pa mailhing mamumuno.
Sakay ang mga biktima sa usa ka SUV-type vehicle sa dihang gi-ambush kini diin ang bana sa Election Officer kay gideklarang dead-on-the-spot tungod sa samad-pinusilan samtang kritikal ang kahimtang ni Abo.
Padayong gilusad sa mga awtoridad ang imbestigasyon bahin niining panghitabo aron masuta kinsa ug unsa ang hinungdan sa krimen.
Matod pa sa inisyal nga taho nga kabahin ra kini sa daghang serye sa kaylap nga pagpamusil sa lugar diin nakapa-aghat sa papahugot sa seguridad sa maong lugar aron mahunong na ang dugoong panghitabo.
Padayong nanawagan ng mga awtoridad sa publiko sa pagtaho kung adunay impormasyon sa insidente aron mahatagan og hustisya ang mga biktima sa sunod-sunod nga serye sa pagpamusil may kalabot sa piniliay karong tuiga.
