CEBU CITY- Patay ang usa ka armadong lalaki human nakigpinusilay sa mga sakop sa Kapulisan sa Balagtas St. Pahina Central, dakbayan sa Sugbo karong adlawa, Marso 27, 2025.
Sa pakighinabi sa Bombo Newsteam sa usa ka tanod sa naasoy nga barangay, gitino niini nga nakadawat sila og taho nga adunay usa ka lalaki nga nagdala og armas.
Ilang gisuwayan nga makig-estorya sa nahisgutang lalaki nga giilang si Alyas ‘Cardo’ nga mo-surrender na apan miinsister kini nga di mo-surrender kay nasayod siya nga dakpon siya.
Tungod niini, nanawag sila sa Kapulisan sa Carbon Police Station-5, apan misukol ang lalaki sa mga kapulisan dihang miresponde na kini sa gikatahong alarma.
Niresulta kini sa komprontasyon sa mga operatiba sa SWAT ug nahitabo ang pinusilay, ug nakadungong na lamang og mga buto sa armas ang mga tawo sa naasoy nga dapit.
Human sa komprontasyon, napalgang nagbuy-od nga patay na ang armadong-lalaki.
Samtang sa pikas bahin, dali nga miabot sa Crime Scene si Police Col. Enrico Figueroa, Acting City Director sa Cebu City Police Office, dinhi gihinabi siya sa mga sakop sa Media.
Atol sa pakighinabi, gibutyag niini nga wala damha sa mga kapolisan ang ka-agresibo sa usa ka lalaki nga giilang si ‘Cardo’.
Kini tungod kay sa pag-abot sa SWAT team kalit lang kining nakigpinusilay hinungdan sa pagkaangol sa usa sa mga sakop sa SWAT team ga naigo sa ulo apan gamay lang kini nga samad hinungdan nga anaa na sa stable nga kondisyon.
Sa pagkakaron, gipalagman pa sa Kapulisan ang ilahang imbestigasyon sa maong insidente.
