Wala na maghandom si Bise Presidente Sara Duterte nga mahatagan og hustisya ang kaso sa iyang amahan nga si kanhi Presidente Rodrigo Duterte ubos sa kasamtangang administrasyon.
Mao kini ang gipaambit sa ikaduhang Presidente diin miingon nga dili na niya makita nga makadawat og igong hustisya ug due process gikan sa gobyerno sa Pilipinas ang kaso sa iyang amahan tungod sa giingong talagsaon nga rendition sa kanhi presidente sa administrasyong Marcos.
Nunot niini, nihangyo ang Bise Presidente nga dili kini mahitabo sa ubang mga Pilipino nga matud pa niya maoy hinungdan nga nagpahigayon og Senate hearings kalabot sa proseso sa pagdakop kang FPRRD.
Gidugang pa ni Sara nga pinaagi sa maong mga pagdungog, ang Senado makabaton og igong mga lagda, giya, ug makamugna og mga balaod aron mapugngan kining mga matang sa mga sitwasyon nga mahitabo pag-usab.
Samtang, gusto na usab karon ni FPRRD nga mapadali ang kaso kay gusto na kining mobalik sa Pilipinas, hilabi na nga gusto kining mamatay sa kaugalingong nasud.
Samtang, nakauli na sa Pilipinas si Bise Presidente diin miabot kni sa Ninoy Aquino International Airport (NAIA) gabii, alas 9:56 sa gabii Abril 06, 2025 pinaagi sa Emirates Airlines flight no. EK 334.
