Gitataw sa Armed Forces of the Philippines (AFP) nga wala silay nadawat nga opisyal nga taho kalabot sa pagkasikop sa tulo ka mga Filipino nga giingong nalambigit sa espionage operation sa China.
Matud ni AFP Public Affairs Office Chief Col. Xerxes Trinidad, ang han-ay ug habig sa AFP walay nadawat nga impormasyon o report gikan sa mga awtoridad kalabot sa maong insidente.
Hinungdan nga dili pa nila makompirmar karong panahona kon tinuod ba nga may kalambigitan sa AFP Intelligence Service ang giingong handler sa tulo ka mga Filipino nga gitanggong karon sa nasod.
Dugang pa niya nga wala usab siya makadawat og opisyal nga impormasyon kalabot sa mga espisipikong pag-angkon sa China o bisan unsang institusyon o ahensya.
Kusganon usab nga gipanghimakak ni Trinidad ang mga taho bahin sa Philippine Intelligence Agency tungod kay matud niya walay ingon niini nga ahensya sa nasud.
Samtang, matod sa Department of Foreign Affairs (DFA), prayoridad karon sa ahensya ang pagpanalipod sa tawhanong katungod ug interes sa tulo ka mga Filipino nga anaa karon sa kustodiya sa mga awtoridad sa China.
Hugot usab nga gibantayan sa mga ahensya sa Pilipinas ang kahimtang sa tulo ka mga Pilipino, diin ang National Security Commission (NSC) kaniadto nagkondena sa mga pagsugid sa mga Pilipino nga dayag nga hinimo-himo.
