CENTRAL VISAYAS- Nasakmit sa Kapulisan sa Central Visayas ang kapin sa 377 gramos sa gituohang shabu, nga mobalor og PhP2,565,776.00, nga nagresulta sa pagkasikop sa 19 ka mga tawo , atol sa ilahang sunodsunod nga malampusong operasyon nga gihimo sulod sa 24 oras o gikan sa alas 6:00 sa buntag niadtong Abril 22 hangtud alas 6:00 sa buntag sa Abril 23, 2025.
Ang mga operasyon miresulta sa pagkasikop sa upat ka high-value individual (HVIs), 10 ka street-level individual (SLIs), ug lima ka bag-ong giila (NI) drug personalities.
Padayun nga gibarugan sa buhatan sa kapolisan sa Kabisay-an ang ilahang padayon nga paghimo og mahukmanong aksyon batok sa mga krimen nga adunay kalabutan sa droga, nga gipunting ang mga gagmay nga tigbaligya ug dagkong mga sindikato sa droga.
Usa sa highlight sa mga operasyon nahitabo dihang ang Abellana Police Station-2 sa Cebu City Police Office nihimo og buy-bust operation sa Sitio Upper Carreta, Barangay Carreta, dakbayan sa Sugbo, diin nasakmit ang 200 gramos sa gituohang shabu nga nagkantidad og PhP1,360,000.00, standard price value.
Kasamtangang gitanggong sa kustodiya sa kapolisan ang tanang nadakpan nga mga suspek ug mag-atubang og kasong paglapas sa Comprehensive Dangerous Drugs Act of 2002.
Gisubli ni Regional Director Police Brigadier General Redrico A. Maranan ang iyang baruganan batok sa pagkuyanap sa ilegal nga drugas sa rehiyon.
Ang PRO7 nag-awhag sa mga lungsuranon nga mahimong aktibo sa pagtaho sa mga kadudahang kalihokan ug pagtrabaho kauban ang pagpatuman sa balaod aron matabangan ang rehiyon nga luwas gikan sa pagbaligya sa ilegal nga droga.
