Giaprobahan na ang ordinansa sa pagpahamtang og mas strikto nga speed limit sa mga kadalanan sa Isla sa Camotes ug Bantayan.
Ang ordinansa ipatuman sa sakyanan nga molatas sa Bantayan, Santa Fe, ug Madridejos sa Bantayan Island, ug Tudela, Poro, Pilar, ug San Francisco sa Camotes Group of Islands.
Ubos sa ordinansa, ang mga sakyanan ug motorsiklo mahimo gihapong modagan sa 60 kph sa national o open roads, 50 kph sa provincial roads o sa kadalanan, ug 20 kph lang sa congested barangay o municipal areas.
Ang mas bug-at nga mga sakyanan sama sa bus, trak, ug traysikol limitado sa 50 kph sa national roads, 40 kph sa provincial roads, ug 20 kph sa crowded zones.
Ang pagpatuman ipaubos sa Cebu Provincial Traffic Management Board, diin ang Department of Transportation (DOTr) ug ang Land Transportation Office (LTO) nanguna sa mga kampanya sa edukasyon uban sa koordinasyon sa mga lokal nga stakeholders ug civil society groups.
Pipila usab ka mga sakyanan walay labot, sama sa mga ambulansya, mga sakyanan nga nagdala sa mga nasamdan o mga medical personnel nga nagtubag sa mga emerhensya, ug mga motorsiklo sa Armed Forces nga nagtubag sa mga kagubot o kasamok.
Ang ordinansa miepekto dayon sa pag-aprobar niini niadtong Abril 28, ug ipatuman human sa gikinahanglang publikasyon.
