CEBU CITY—Posibleng mag-atubang og kaso ang Cebu Provincial Government, nga nag-operate sa Cebu North Bus Terminal (CNBT), human sa pagpabayad sa mga pasahero aron makagamit sa pansayan (restroom) sa terminal.
Kini ang gibutyag ni Sen. Raffy Tulfo, sa iyang shared video clip sa social media niadtong Sabado, Mayo 3, 2025.
Sa gipahigayung senate committee hearing sa Committee on Public Services, si Tulfo nagkanayon nga aduna siyay nakitang pipila ka mga kalapasan ngadto sa CNBT.
Atol sa hearing, gikutlo ni Sen. Tulfo ang Republic Act 11311, kon “an Act to Improve Land Transportation Terminals, Stations, Stops, Rest Areas, and Roll-on/Roll-off Terminals,” diin nagmando sa pag-improbar sa mga pasilidad ug pagdili sa tanang mga lakang batok sa balaud.
Nanawagan usab ang senador sa Department of Transportation (DOTr) ug Land Transportation Franchising and Regulatory Board (LTFRB), nga imbestigaran ang naasoy nga pasilidad.
Samtang gimandoan usab ni LTFRB Executive Director Loumer Bernabe, ang Central Visayas regional director nga mag issue og show cause order basi sa nasayran atol sa inspection.
Kahinumdoman, nga nagpahigayun usab ug kaugalingong inspeksiyon si Gov. Gwen Garcia sa nakalabayng buwan ug mipasabut nga ang maong pasilidad kabahin usab sa public-private partnership tali sa Kapitolyo ug Mr. Loo Philippines, rason nga aduna kini P10 fee alang sa pag-gamit sa pasilidad. | Bombo Nathaniel Sandoval
