Mibuhi na usab og seryosong alegasyon si Bise Presidente Sara Duterte batok sa administrasyon ni Presidente Ferdinand Marcos Jr., taliwala sa nagkagrabeng panagbangi tali sa mga kaalyado nga nahimong magkaribal sa gobyerno.
Matud ni VP Duterte nga ang mga pag-atake batok kaniya ug sa iyang pamilya dili mohunong hangtod nga siya mapriso o mamatay.
Migawas ang pamahayag pipila ka adlaw human ang iyang igsuon nga si Davao City Rep. Paolo Duterte kay gipasakaan og kasong physical injuries ug grave threats kalabot sa giingong pag-atake sa usa ka negosyante sa usa ka bar sa Davao niadtong Pebrero, usa ka insidente nga giubanan sa CCTV footage.
Apan giinsister ni VP Sara nga walay labot ang lokal nga politika sa Davao sa reklamo batok ni Paolo Duterte ug gitataw niya nga ang Philippine National Police ug Criminal Investigation and Detection Group (CIDG) mismo ang nagpaluyo sa kaso.
Ingon man nga wala kini nabalaka sa sunodsunod nga isyu batok sa iyang pamilya: gikan sa pagkasikop sa iyang amahan nga si kanhi Presidente Rodrigo Duterte sa The Hague; sa iyang pending nga impeachment trial karong Hulyo; hangtod sa kaso sa iyang igsoon.
Kini gumikan aduna silay mga abogado nga maoy modumala niining mga butanga.
Gikubkob usab ni Duterte ang Palasyo, human nagdumili sa direktang paghisgot kang Presidente Marcos. Matod niya nga ang mga Pilipino dili mailad pinaagi sa politikanhong pag-atake samtang ang administrasyon walay konkretong programa alang sa nasud.
Dugang pa niya nga ang katawhan maoy nangita sa tinuod nga kalambuan ug kalinaw, dili panagsumpaki sa gobyerno.
Bisan unsa pa ang ilang pag-atake, dili gihapon mosugot ang administrasyon. Matod pa nila, dili gihapon makita ang gitawag nga ‘Bagong Pilipinas’.
