Subling gibarugan sa Palasyo Malacañang nga walay basehanan ang pamahayag ni Bise Presidente Sara Duterte batok kang Presidente Ferdinand Marcos Jr. nga siya ang responsable sa pagdakop kang kanhi Presidente Rodrigo Duterte.
Matod ni Claire Castro nga subay sa balaod ang lakang sa gobyerno sa pagdakop ug pagtugyan kang kanhi Presidente Rodrigo Duterte ngadto sa International Criminal Court.
Dugang pa niini nga ang pagdakop kang Duterte gihimo isip kabahin sa legal nga proseso ug sa pakigtambayayong sa Interpol sa gobyerno.
Gipasabot sa Opisyal sa Palasyo nga ang kanhi Presidente giakusahan sa kasong crimes against humanity nga gisang-at sa mga biktima sa giingong extrajudicial killings nga nahitabo ubos sa iyang kampanya sa war on drugs.
Ingon man nga ang lakang sa administrasyon wala magpasabot sa pagtugyan sa soberanya sa Pilipinas.
Ang pamahayag sa Palasyo isip tubag sa pamahayag ni Sara Duterte nga kinahanglang manubag si Marcos Jr. tungod kay gitugotan niya ang mga langyaw nga entidad ug langyaw nga organisasyon nga manghilabot sa nasudnon nga soberanya sa nasud.
