Gipasalig sa Malacañang nga motubag ang lima ka dagkong opisyal sa gobyerno sa reklamo nga gipasaka ni Senador Imee Marcos kalabot sa pagkasikop kang kanhi Presidente Rodrigo Duterte.
Matod ni Palace Press Officer Claire Castro, nga ang mga opisyal mosumiter sa ilang counter-affidavits ngadto sa Office of the Ombudsman isip kabahin sa legal nga pamaagi.
Lakip sa gireklamo ni Senador Imee mao sila si Department of Justice Secretary Jesus Crispin Remulla, Department of the Interior and Local Government Secretary Jonvic Remulla, Philippine National Police Chief Gen. Rommel Marbil, PNP Criminal Investigation and Detection Group Chief Maj. Gen. Nicolas Torre III, ug Special Envoy for Transnational Crimes Markus Lacanilao.
Ingon man nga subling gipasabot ni Castro nga ang mga lakang nga gihimo sa mga opisyal subay sa balaod ug gihimo uban sa koordinasyon sa Interpol, isip tubag sa kaso nga giatubang ni Duterte sa International Criminal Court.
Dugang pa niini nga nasayod kini sa gahom nga anaa ang Ombudsman ug tungod sa paspas nga aksyon niini kabahin sa reklamo kay gipasalig niya nga motubag ang mga gireklamo.
