Nunot sa hingpit na nga pagpagawas sa warrant of arrest batok kang Atty. Harry Roque, masaligon si Criminal Investigation and Detection Group (CIDG) Director Major General Nicolas Torre III nga masubay usab ang nahimutangan sa kanhi kalihim nga nagtago-tago.
Matod sa beteranong heneral, nag-umol dayon ang CIDG og tracker teams ug gipakatap kini aron pangitaon si Roque.
Kahinumduman nga ang CIDG misang-at og reklamo batok sa kanhi presidential spokesperson tungod sa giingong pagkalambigit niini sa human trafficking activities nga naglambigit sa Lucky South 99, ang giingong dakong Philippine Offshore Gaming Operator (POGO) hub sa probinsiya sa Pampanga.
Ning milabay nga adlaw, ang lokal nga korte sa Angeles City, Pampanga niluwat usab og warrant batok kang Roque.
Lakip usab niini si Cassandra Li Ong, ug 49 ka uban pang mga indibidwal.
Duha ka buwan sa wala pa ma-isyu ang warrant, nitunga si Roque sa The Hague, Netherlands aron motabang sa kaso ni kanhi Pres. Rodrigo Duterte nga gitanggong karon sa International Criminal Court.
Sa ulahi si Roque niingon nga mi-apply siya og asylum sa Netherlands tungod sa giingong political persecution nga gipahamtang kaniya dinhi sa Pilipinas.
