Nangulo si Presidente Ferdinand R. Marcos Jr. sa groundbreaking sa PHP249.8-million nga Sky Garden nga proyekto sa Alaminos City, usa ka flagship development nga gilauman nga mopalambo sa turismo nga talan-awon ug makamugna og mga trabaho alang sa mga Pangasinenses, gahapong adlawa, Biyernes, Mayo 23, 2025.
Ang Sky Garden gitawag nga usa ka “game-changer” alang sa rehiyonal nga turismo, ug gilantaw isip usa ka moderno nga green space nga adunay taas nga mga garden, panoramic viewing deck, interactive zones, walkways, ug retail spaces nga gidesinyo sa pagdani sa lokal ug langyaw nga mga turista.
Ang Presidente nagkanayon nga ang Sky Garden usa ka produkto sa kolaborasyon tali sa local government unit (LGU) sa Alaminos City, TIEZA (Tourism Infrastructure and Enterprise Zone Authority), ug DOT (Department of Tourism).
Gipasiugdahan usab ni Marcos ang papel sa Sky Garden sa pagpalig-on sa mga lokal nga sistema sa ekonomiya, kalikupan, ug katilingbanon, ingon nga kini gilauman nga makamugna og mga 200 ka trabaho ug makapauswag sa panginabuhi sa mga 30 ka lokal nga konsesyonaryo.
Dugang niana, ang nahisgutang proyekto nakita nga usa ka dinamikong luna alang sa pagpahayahay, sosyal nga interaksyon, ug malungtarong urban biodiversity conservation, ug gidisenyo aron mahimong inklusibo ug “senior-friendly,” maghatag kini ug mga oportunidad sa mga lokal nga negosyante nga magtukod ug mga café, souvenir shop, ug eco-tour, samtang nagsuporta sa duol nga mga atraksyon sama sa Hundred Islands National Park ug ang walo ka ektarya nga Mangrove Eco-Park.(Bombo Irene Ardiente)
