TALISAY CITY, CEBU- Nasikop sa mga operatiba sa PDEA 7 Regional Special Enforcement Team ug sa kapulisan sa Dakbayan sa Talisay ang usa ka senior citizen, subay sa nahitabong buy bust operation sa Purok Greenville, Brgy. San Isidro, Dakbayan sa Talisay, pasado 9:55 sa buntag, Hunyo 1, 2025.
Ang suspek naila sa alyas nga si “Nanay”, 60 anyos, walay trabaho, ug residente sa nahisgutan nga barangay.
Nakuha sa posesyon sa suspek ang upat ka pakete sa gidudang shabu, nga motimbang ug 100 grams ug gibana-banang mobalor ug PHP 680,000.
Na-recover usab sa mga operatiba ang buy bust money, mga resibo sa money transfer, mga drug paraphernalia, ug uban pang mga gamit sa ilegal nga kalihokan.
Busa, ang mga nakuha nga ebidensiya gisumiter na sa PDEA 7 Regional Office samtang anaa na sa kustodiya sa PDEA si alyas “Nanay” diin sa pagkakaron giandam na pud ang kasong kalapasan sa Article 2, Section 5 and 11 sa RA 9165 o Comprehensive Dangerous Drugs Act of 2002.
