Tun-an una ni Senate Committee on Labor Chairperson Senador Joel Villanueva ang nahimong basehanan sa Kamara sa pag-aprobar sa P200 Legislated Daily Wage Hike sa mga trabahante sa pribadong sektor.
Mao kini ang gustong himuon sa senador sa umaabot nga Bicameral Conference Committee Meeting aron ma-reconcile ang duha ka bersiyon sa maong balaudnon, ug gusto nilang makita ang pagtuon nga mahimong makakumbinser kanila sa pagpahaom sa bersyon sa Kamara.
Kahinumdoman nga kini nga kantidad doble sa P100 Legislated Wage Hike version nga giaprobahan kaniadto sa Senado.
Gipasabot usab sa senador nga gusto lang nilang likayan ang pag-veto ni Presidente Ferdinand R. Marcos Jr. sa balaodnon nga wage hike bill.
Gumikan kung ilang ipahiangay ang P200 nga bersyon sa Balay, mahimong moreklamo ang sektor sa negosyo.
Kung kahinumdoman nga ang orihinal nga bersyon sa gisugyot nga balaod nga usbaw sa matag adlaw nga suholan kay P150 apan human sa mga konsultasyon, debate, ug deliberasyon, gipaubos kini sa Senado ngadto sa P100.
Una nang giaprobahan sa Senado ang ilang final version sa P100 legislated wage hike niadtong Pebrero 2024 samtang niagng adlaw gipasar sa Kamara ang ilang bersyon sa P200 Legislated Wage Hike sa ikatulo ug katapusang pagbasa.
