Nagpagawas ug opisyal nga pahayag ang defense team ni VP Sara Duterte karung adlawa Lunes, Hunyo 9, taliwala sa panawagan nga ipadayon sa Senado ang impeachment trial sa Bise Presidente.
Matod nila, bisan pa nga dili sila mokomentaryo sa internal nga mga butang sa Senado, ilang giinsistir nga ang pagsugod sa proseso, labi na ang ikaupat nga impeachment complaint, usa ka “seryoso nga paglapas sa Konstitusyon.”
Matod nila nga dili angayang gamiton nga hinagiban ang proseso sa impeachment batok sa mga kaatbang sa politika. Kini usa ka mekanismo sa konstitusyon, dili usa ka politikanhong himan o instrumento sa politikanhong pagpanghadlok.
Hinuon, gitataw sa kampo ni VP Duterte nga andam silang atubangon ang mga kaso kung ipadayon sa Senado ang husay.
Ang pamahayag nagkanayon nga andam silang ipakita nga walay basehanan ang mga akusasyon batok sa Bise Presidente.
Gipagawas kini nga pahayag taliwala sa nagkadako nga panawagan gikan sa mga unibersidad, civil society groups, ug mga magbabalaod alang sa Senado nga respetuhon ang Konstitusyon ug sugdan ang husay sa mga kaso nga gipasaka batok kang Duterte, lakip na ang iyang giingong pagkalambigit sa Davao Death Squad.
