Gihimakak ni Tingog Partylist Representative Yedda K. Romualdez ang istorya nga adunay posibilidad nga mulansar kini pagka-gobernador sa Sugbo inig piniliay sa tuig 2028.
Kini ang pamahayag sa babayeng Romualdez pinaagi sa iyang Facebook page sa pag-deny sa mga espekulasyon nga walay sumbanan sa paggamit sa iyang pangalan sa mga politikanhong agenda.
Sa maong statement, mipadayag kini sa publiko ilabi na sa mga Sugbuanon sa pagpasabot nga siya gibuhat-buhatan og istorya sa paglansar isip Gobernador sa lalawigan sa Sugbo.
Matod niini nga dili siya mudagan pagka-gobernador o sa bisan og unsang posisyon sa Sugbo tungod wala kini mibalhin sa iyang residency ug ang address niini kay anaa sa Leyte kauban sa iyang bana nga si House Speaker Ferdinand Martin Romualdez.
Apan kasayran nga ang pamilya ni Yedda sa pagkadalaga kay gikan sa Sugbo diin apo kini ni anhing Cebuano labor leader Democrito Mendoza sa lungsod sa Liloan ug diri pa sa dakbayan nagtunga sa iyang kolehiyo.
Gitapos ni Romualdez ang iyang pamahayag pinaagi sa pagpasalamat sa publiko sa pagtugot kaniya sa pagklaro sa kamatuoran.
