Niluwat og apela ang usa ka Constitutional Law Expert nga si Atty. Jennifer Arlene Reyes, batok sa mga naglingkod nga senator judges kalabot sa isyu sa impeachment batok kang Bise Presidente Sara Duterte, diin iyang gihangyo ang mga senador nga ipatuman ang nalatid sa konstitusyon ug ipadaplin ang ilang personal nga interes, apil ang politika.
Niinsistir si Atty Reyes nga kinahanglang walay gidapigan tungod kay ang konstitusyonal nga mandato, naglaum nga sila modesisyon sumala niini ug basi sa aktuwal nga impeachment trial.
Busa, iyang gipasabot nga ang mga senador judges nga maoy gitahasan sa paghatag og hukom sa ikaduhang presidente, kinahanglang tagdon ang ilang katungdanan isip alagad sa katawhan.
Matod niya, dili sila angayan nga magrepresentar og opisyal o kaalyado sa politika, apan iyang gi-apelar nga ang katawhan maoy prayoridad niini nga butang.
Nunot sa kabalaka, giklaro sa nahisgutang constitutional expert nga sa pagkakaron, kuwang ang lagda sa Senado bahin sa impeachment, kay walay makasulti o makatugot sa pag-inhibit sa usa ka senador tungod sa iyang paboritismo sa usa ka bahin.
Tungod niini, si Atty. Jennifer Arlene Reyes mipahibalo sa iyang panawagan sa ika-20 Kongreso nga maghimo og bag-ong mga lagda aron mapagaan ang isyu sa usa ka senador nga ‘biased’ sa pagpahigayon og impeachment trials batok sa mga kurakot o akusado nga mga opisyal sa gobyerno. | via Bombo Irene Ardiente
